Қазақстандық боксшы ABF чемпионын дебюттік жекпе-жекте нокдаунға түсірді

Sports.kz хабарлағандай, қазақстандық жауынгер Нұрқанат Райыс кәсіби рингтегі дебютін сәтті өткізді.

Ақтау порт-қаласында өткен бокс кешінде отандасымыз екі жеңіс пен бір тең түсуі бар ирандық боксшы Саджад Каземсадех Поштиримен кездесті. Оның барлық жеңістері нокаутпен келген.

Орта салмақта алты раундқа жоспарланған жекпе-жек Нұрқанат Райыстың сенімді жеңісімен аяқталды – төрешілер бірауыздан жеңісті қазақстандық спортшыға берді. Жекпе-жектің шешуші сәті бесінші раундта болды: Райыс қарсыласын нокдаунға түсірді.

Айта кету керек, Нұрқанат Райыс әуесқой бокста елеулі жетістіктерге жеткен, оның ішінде Азия чемпионатының күміс жүлдегері атанған. Ал оның қарсыласы Поштири осы жекпе-жекке дейін бірінші орта салмақта Азия бокс федерациясының (ABF) чемпионы атағын иеленген.