Қазақстан vs. Пәкістан: Дэвис кубогының элитасына оралу үшін күрес

1–2 ақпан күндері Астанада Қазақстан ерлер теннис құрамасы Дэвис кубогының бірінші әлемдік тобының плей-офф кезеңінде Пәкістан командасымен алғаш рет кездеседі. Ойындар Beeline Arena жабық хард кортында өтеді.

Бұл плей-офф кездесуі – осы демалыс күндері өтетін 39 Дэвис Кубогы матчтарының бірі. Олардың қатарында 13 іріктеу матчы, 13 бірінші әлемдік топтың плей-офф ойыны және 13 екінші әлемдік топтың плей-офф кездесулері бар.

Қазақстан теннис федерациясының президенті Болат Өтемұратов бұл матч жанкүйерлерге жарқын эмоциялар мен ұмытылмас спорттық әсер сыйлайтынына сенімді.

«Үйдегі корт пен жанкүйерлердің қолдауы, олардың арасында елдің әр түкпірінен келген жас теннисшілер де бар, біздің құраманың жеңіске жетуіне және командалық әлем чемпионатының келесі кезеңіне өтуіне көмектеседі», – деді ол.

Өткен жылдың қыркүйегінде Қазақстан құрамасы Даниядан (1:3) жеңіліп, Davis Cup Finals-2025 іріктеу кезеңіне өте алмады. Енді команда элиталық дивизионға қайта оралу үшін күресуге мәжбүр. Пәкістанды жеңу арқылы Қазақстан күзде жоғары топқа оралу мүмкіндігі үшін күреседі, ал жеңіліс бірінші әлемдік топтағы орнын жоғалтып алу қауіпіне әкеледі.

Пәкістан құрамасында ATP рейтингіндегі ойыншылар жоқ, бірақ команда сәтті жағдайлардың арқасында дивизиондағы орнын сақталып қалды. Өткен жылы олар Үндістаннан (0:4) және Барбадостан (1:3) жеңіліп, екінші әлемдік топқа ауысуы керек еді. Алайда екі рет жеңілген бес команданың ішінде ең сәтсіздері Ирландия, Латвия және Жаңа Зеландия болды, ал Пәкістан мен Мексика плей-офф кезеңінде ойнау мүмкіндігін сақтап қалды.

Қазақстан құрамасының капитаны Юрий Щукин қарсыластарда рейтинг болмаса да, оларды немқұрайлы қарауға болмайтынын атап өтті.

«Біз оңтайлы құраммен ойнаймыз, барлығы жеңіске жетуге дайын», – деді ол матч алдындағы баспасөз конференциясында.

Матч кестесі:

1-ші ақпан

Александр Шевченко (Қазақстан, ATP рейтингінде №75) vs. Музамиль Муртаза (Пәкістан, ATP рейтингінде жоқ)

Бейбит Жукаев (Қазақстан, ATP рейтингінде №230) vs. Хузайфа Абдул Рехман (Пәкістан, ATP рейтингінде жоқ)
2-ші ақпан

Жұптық кездесу: Александр Шевченко / Тимофей Скатов vs. Акел Хан / Музамиль Муртаза

Жекелей кездесулер: Шевченко vs. Рехман, Жукаев vs. Муртаза

Матч форматы

Матч төрт жекелей және бір жұптық кездесуден тұрады. Барлығы үш сеттен өтеді. Үш матчта жеңіске жеткен команда жеңімпаз атанады.

 Сурет авторы: Андрей Ударцев