«Қазақстан Кубогында кез келген команда жарқ ете алады» — Қазыбек Тайланов алдағы 1/8 финал ойындары туралы

12 сәуірде Қазақстан кубогының негізгі кезеңі басталады. Бәсекеге премьер-лиганың барлық клубтары, сондай-ақ іріктеу кезеңінің жеңімпаздары — «Хан-Тәңірі» және «Каспий» қатысады. 12 және 13 сәуірде өтетін 1/8 финалда командалар бір ойыннан өткізеді. Жеңімпаздар ширек финалға жолдама алады.

Футбол сарапшысы Қазыбек Тайланов Sport Pulse тілшісіне алдағы ойындарға қатысты пікір айтты:

Ұлытау — Елімай

— Қос команда өткен аптада ҚПЛ-дың 4-ші турында кездесіп, «Ұлытау» жеңіліске ұшырады. Жезқазғандықтар қарымта қайтара ала ма?

— Бұл мүлде басқа ойын болмақ. Себебі Кубок — бөлек шайқас. Мұнда фаворитті анықтау оңай емес. Барлығы командалардың бұл турнирдегі мақсаттарына байланысты. Көбіне Кубок үшін бәсекеде алаңға қосалқы құрамдағы ойыншылар шығады. Сондықтан жеңімпазды болжау қиын.

Сурет: ҚПЛ 4-тур. Елімай — Ұлытау (3:0)

Қызылжар — Қайсар

— Қос команда осы маусымда тұрақсыз ойнап келеді. Бұл кездесуден не күтуге болады?

— Ойын қызықты болғалы тұр. «Қайсар» жергілікті ойыншыларға сенім артады, ал «Қызылжар» үміт артуға болатын команда екенін дәлелдеуге тырысады. Бұл кездесуде көп гол болады деп ойлаймын.

Қайрат — Каспий

— «Каспий» футболшылары «Қайратқа» лайықты қарсылық көрсете ала ма?

— «Каспийдің» мүмкіндігі бар. Бұл — Кубок, мұнда барлығы бір матчта шешіледі. Сондықтан жеңімпазды алдын ала болжау қиын. Негізгі кезеңнің жолдамасына ие болған «Каспий» кез келген қарсыласқа лайықты қарсылық көрсете алатынын дәлелдеді.

Сурет: «Каспий» ФК

Тұран — Атырау

— Өткен жылы ақтық сында жеңілген «Атырау» биыл Кубокты жеңетін мүмкіндігі бар ма?

— Кубок — ерекше турнир, ал «Атыраудың» мотивациясы жеткілікті. Бұған қоса, бұрынғы бас бапкері Виталий Жуковский енді «Тұранның» тізгінін ұстап келмек. Бұл ойынға қосымша интрига қосады. Әртүрлі ойын өрнегі бар, қызықты матч болмақ.

Сурет: Виталий Жуковский

Оқжетпес — Астана

— «Астана» аяқдопшыларының қазіргі қарқынын ескерсек, олар ротациядан бас тартып, Кубок үшін барын салуы мүмкін бе?

— «Астана» Кубок үшін ойындарда алаңға көбіне жастарды шығарады, бұл — қосалқы құрамдағы футболшыларды тексеруге тамаша мүмкіндік. Ал «Оқжетпес» өз алаңында қарсыластарына қиындық тудыра алатын команда. Көкшетаулықтар кез келген фаворитке лайықты қарсылық көрсете алатынын дәлелдеді. Олардың тәжірибелі ойыншылары бар. Аслан Дарабаев пен Тимур Досмағамбетов кезінде еліміздің 7 дүркін чемпионы «Астананың» құрамында өнер көрсеткен.

Сурет: Тимур Досмағамбетов және Аслан Дарабаев

Хан-Тәңірі — Ордабасы

— «Хан-Тәңірі» — аутсайдер саналады, бірақ мінезі бар команда. «Ордабасы» қарсыласты менсінбей, опық жеуі мүмкін бе?

— ҚПЛ-дегі тұрақсыз ойындарын ескерсек, «Ордабасы» бұл жолы жанкүйерлер күткен футболды көрсетуге тырысады. «Хан-Тәңірі» үшін бұл матч оңай болмайды. Бірақ алматылықтар тосын сый жасай алатынын дәлелдеді. Егер шымкенттіктер қарсыласын жете бағаламайтын болса, жағдай ушыға түседі.

Жеңіс — Ақтөбе

— Кубоктың қазіргі иесі мәртебесі «Ақтөбеге» қосымша күш бере ме, әлде керісінше қысым бола ма?

— Титулды қорғау оны жеңіп алудан қиын. «Жеңіс» — тәжірибелі команда, былтыр Лига кубогының ақтық сынына дейін жетті. Қос команда арасындағы кездесу 1/8 финалдың орталық матчы десек болады. Жеңімпазды болжау қиын.

Сурет: «Актобе» ФК

Тобыл — Жетісу

— «Жетісу» бұл ойында «Тобылды» таң қалдыра ала ма?

— «Жетісу» биылғы маусымда сапалы футбол көрсетіп жүр. Сондықтан «Тобылға» көп тер төгуге тура келеді. Самат Смақовтың командасы жете бағаланбай қалса, тосын сый жасауы мүмкін.

Қазақстан Кубогының қазіргі иесі — «Ақтөбе» аяқдопшылары. Олар өткен маусымның ақтық матчында «Атырауды» 2:1 есебімен жеңген болатын. Ал ел біріншілігінде ақтөбеліктер үшінші орынды иеленді.

Біздің парақшамыздан футбол матчтарының барлық нәтижелерін Live форматта бірінші болып біліңіз!