Қазақстан боксшылары Әлем кубогында ширек финалға шықты

Бразилияның Фос-ду-Игуасу қаласында World Boxing ұйымы өткізетін Әлем кубогы жалғасып жатыр. Қазақстан құрамасынан төрт боксшы ширек финалдық кезеңде рингке шығады.

Астана уақыты бойынша 22:00-де басталатын күндізгі сессияда екі қазақстандық өнер көрсетеді:

• 55 келі салмақта Нұрсұлтан Алтынбек француз Белал Беналиге қарсы жұдырықтасады

• 70 келі салмақта Дархан Дүйсебай француз Макан Траормен кездеседі

Түнгі сағат 02:00-де басталатын бағдарламада тағы екі жекпе-жек өтеді:

• 51 келі салмақта Жазира Оракбаева бразилиялық Каролин Алмейдамен кездеседі

• 80 келі салмақта Диас Молжігітов поляк Никоден Козакпен рингке шығады

Бастапқыда Қазақстан құрамасы турнирге 8 ер және 3 әйел спортшымен қатысқан болатын. Алайда жарыстың екінші күнінде төрт боксшы (үш ер, бір әйел) жарысты тоқтатуға мәжбүр болды.