Карвахальдің Сакамен қақтығысы УЕФА тарапынан қатаң жазалануы мүмкін

As басылымының мәліметінше, мадридтік «Реал» қорғаушысы Даниэль Карвахаль Чемпиондар лигасының ширек финалында Букайо Сакаға жасаған әрекеті үшін бірнеше матчқа шеттетілуі мүмкін.

Оқиға «Сантьяго Бернабеудегі» қарымта матчтың үзілісінде орын алған — Карвахаль стадион дәлізінде «Арсенал» шабуылшысы Саканың мойнынан ұстаған. Қақтығысқа Саканың «паненка» стилінде орындаған пенальтиі себеп болған — бұл соққыны Тибо Куртуа қайтарған болатын.

Егер бас төреші Франсуа Летексье бұл сәтті ресми хаттамаға енгізсе, Карвахальге төрт матчқа дейін дисквалификация қаупі төніп тұр — оның бірі техникалық аймаққа рұқсатсыз кіру үшін, ал қалған үшеуі — агрессивті мінез-құлқы үшін.

Айта кетейік, қос матч қорытындысы бойынша «Реал» 1:5 есебімен жеңіліп, турнирден шеттетілді.

Біздің парақшамыздан футбол матчтарының барлық нәтижелерін Live форматта бірінші болып біліңіз!