Карлос Адамес пен Жәнібек Әлімханұлы арасындағы жекпе-жек мәселесі

Орта салмақтағы WBC чемпионы Карлос Адамес пен WBO және IBF белбеулерінің иегері Жәнібек Әлімханұлы арасындағы ықтимал жекпе-жек жайлы пікірталас жаңа серпін алды. X әлеуметтік желісінде жанкүйерлер мен сарапшылар тарапынан түрлі айыптаулар айтылып, екі лагерьдің уәждері ашық талқыға түсті.

Бір қолданушы Адаместің қазақстандық боксшының бірнеше жылдан бергі шақыруларына жауап бермегенін, тіпті Twitter желісінде бірде-бір реакция танытпағанын айтып сынға алды.

Адамес бұл пікірге былай деп жауап берді:
«Олай емес, менің компаниям оған ұсыныс жіберді, бірақ ол жауап бермеді. Біз оған хат жібердік — ештеңе болмады», — деді чемпион.

Алайда пікірталас мұнымен бітпеді. Тағы бір қолданушы WBC чемпионын фактілерді бұрмалады деп айыптап, Жәнібек Әлімханұлының командасы нақты қаржылық ұсыныспен дайын келісімшарт жібергенін, ал Адамес тек жалпылама жауап бергенін мәлімдеді. Бұл айыптауға Адамес қысқа ғана терістеумен жауап қайтарды.

Әзірге тараптардың ресми өкілдері пікір білдірмеді. Осы екі мықты чемпионның жекпе-жегі орта салмақтың шын патшасын анықтауы мүмкін — алайда бұл тек сөз жүзінде қалып отыр.