Карло Анчелотти ФИФА нұсқасы бойынша 2024 жылдың үздік футбол жаттықтырушысы атанды

Мадридтік «Реалдың» бас жаттықтырушысы Карло Анчелотти Халықаралық футбол федерациясының (ФИФА) 2024 жылғы үздік жаттықтырушы атағын иеленді. Итальяндық маман бұл марапат үшін тартыста Лионель Скалони, Хосеп Гвардиола, Хаби Алонсо және Луис Де ла Фуэнте сияқты атақты әріптестерін басып озды.

2024 жыл Анчелотти мен оның командасы үшін өте табысты болды. Оның басшылығымен «Реал» Чемпиондар лигасында, Испания чемпионатында, елдің Суперкубогында және УЕФА Суперкубогында жеңіске жетті. Бұл марапат итальяндық жаттықтырушының футбол әлеміндегі орасан зор беделін тағы да дәлелдеді. Бұған дейін қазан айында Анчелотти УЕФА-ның үздік жаттықтырушысы сыйлығын алған болатын.

Әйелдер футболында үздік жаттықтырушы атағын Эмма Хейс жеңіп алды. Бұрын «Челсиді» жаттықтырған, қазіргі уақытта АҚШ құрамасының бас бапкері болып табылатын Хейс, командасын Париждегі Олимпиада ойындарында алтын медальға жеткізді. Оның басшылығымен АҚШ құрамасы финалда Бразилияны 1:0 есебімен жеңді. Сонымен қатар, Хейс Англия чемпионатында «Челсиді» жеңіске жетелеген.

The Best FIFA Football Awards марапаттау рәсімі сейсенбі күні Катардың астанасы Дохада өтті.