Италияның ең көне клубтарының бірі банкрот деп танылды

Италия футбол федерациясы (FIGC) «Брешия» клубын ресми түрде кәсіби футбол жарыстарына қатысушылар қатарынан шығарды. Команда 2025/26 жылғы маусымға лицензия ала алмады.

Мұның себебі – қаржылық тәртіптің өрескел бұзылуы. Клубтың иесі Массимо Челлино қарыздарды өтеу үшін қажет 3 миллион еуроны төлеуден бас тартқан. FIGC мәліметінше, клуб лигаға тиесілі 1,1 миллион еуроны төлемеген, наурыз және сәуір айларының жалақыларын кешіктірген, сондай-ақ өзге де қаржылық міндеттемелерін орындамаған.

1911 жылы құрылған «Брешия» ресми түрде банкрот деп жарияланды. 114 жылдық тарихында клуб бірнеше рет Серия А-да ойнаған. Әр жылдары бұл командада Андреа Пирло, Роберто Баджо және Пеп Гвардиола сынды футбол аңыздары өнер көрсеткен.