Исатай Мәди: «Бұл жеңіліс үш жеңістен артық»

Қазақстандық комментатор әрі ММА сарапшысы Исатай Мәди қазақстандық спортшы Асу Алмабаевтың (21-3) UFC Vegas 103 турнирінде Манель Капемен (21-7) өткен жекпе-жегін бағалады, деп хабарлайды Meta-ratings.kz порталы.

«Бұл жеңіліс үш жеңістен артық. Енді Асу өзін жаңа қырынан көреді. Жеңісті серия жалғасып жатқанда, айналаңдағы адамдар «Сен мықтысың», «Сенің күресің керемет» деп айта береді, ал сен оған сене бастайсың. Бірақ содан кейін «Бах!» — Капені клинчке алғың келеді, бірақ ол сені балаша итеріп жібереді», — деді Мәди PROMMA подкастында.

Еске сала кетейік, Асу Алмабаев Манель Капеден үшінші раундта техникалық нокаутпен жеңіліп қалды. Қарсыласының ауыр соққыларынан кейін төреші жекпе-жекті тоқтатуға мәжбүр болды. Бұл жеңілістен кейін Алмабаев UFC рейтингінде 8-орыннан 9-орынға түсті.