Хосеп Гвардиола “Манчестер Сити” клубымен келісімшартты ұзартты

Matchtv.ru хабарлауынша, Хосеп Гвардиола “Манчестер Сити” клубымен келісімшартын 2027 жылға дейін ұзартты. Бұрынғы келісім 2025 жылдың жазында аяқталуы тиіс еді.

Бұл жаңалыққа қатысты клубтың шабуылшысы Эрлинг Холанд өз пікірін білдіріп, Sky Sports-қа берген сұхбатында Гвардиоланы “әлемдегі ең жақсы жаттықтырушы және тарихтағы үздік маман” деп атады.

Холанд Гвардиоланың жетекшілігімен жоғары нәтижелер көрсетуде. Ағылшын Премьер-лигасының ағымдағы маусымында норвегиялық шабуылшы 11 матчта 12 гол соғып, үздік деңгейін растады.

Қазіргі уақытта “Манчестер Сити” турнир кестесінде 23 ұпаймен екінші орында, көшбасшы “Ливерпульден” бес ұпайға артта келеді.

Сонымен қатар, Эрлинг Холанд 17 қарашада Норвегия құрамасының Қазақстанды 5:0 есебімен жеңген ойынында хет-трик жасап, өзінің шеберлігін тағы бір мәрте дәлелдеді.