ХОК 2026 жылғы қысқы Олимпиадаға бейтарап спортшыларды қатыстыру мәселесін талқылауды жалғастыруда

Sports.ru мәліметінше, Халықаралық олимпиада комитеті (ХОК) 2026 жылы Италияда өтетін қысқы Олимпиадаға бейтарап мәртебедегі спортшылардың қатысуы бойынша халықаралық спорт федерацияларымен келіссөз жүргізіп жатыр.

ХОК-тың спорт жөніндегі директоры Кит Макконнелл атқару комитетінің отырысынан кейін өткен баспасөз мәслихатында келіссөздердің барысын түсіндіріп, жазғы Олимпиадада бейтарап спортшылардың сәтті өнер көрсетуін мысалға келтірді.

«Біз қысқы спорт түрлері бойынша федерациялармен келіссөздер жүргізіп жатырмыз. Париж Олимпиадасында бейтарап спортшылар еш қиындықсыз өнер көрсетті — біз осы тәжірибені қолдана отырып, нақты әрі айқын хаттамалар ұсынып отырмыз», — деді Макконнелл.

Оның айтуынша, хаттамада қатаң допингке қарсы талаптар мен бейтараптық критерийлері көрсетілген. Қазірдің өзінде ски-альпинизм бойынша келісімге қол жеткізілген. Ал конькимен жүгіру, мәнерлеп сырғанау және шорт-трек бойынша келіссөздер жалғасып жатыр.