Хэмилтон Ferrari-дегі қиындықтардың себебін түсіндірді

Льюис Хэмилтон Ferrari сапындағы алғашқы айларында тұрақсыз нәтиже көрсетуінің себебін түсіндірді. Оның айтуынша, басты мәселе — жаңа көліктің баптауларын толық зерттеп үлгермеуі.

«Бұл бірнеше фактордың үйлесімі, бірақ негізгісі — көлікті дәл баптау. Мен әлі де бұл көлікті зерттеп жатырмын және барлық баптау нұсқаларын сынап көрген жоқпын», — деді британдық жүргізуші Шанхайдағы жарыстан кейін.

Mercedes командасынан Ferrari-ге ауысқан жеті дүркін әлем чемпионы жаңа көлікпен жұмыс істеудің күрделі екенін жасырмады. Оның айтуынша, Қытайдағы жарыс алдында құрғақ ауа райында толыққанды сынақ өткізуге мүмкіндігі болмаған, сондай-ақ маңызды C2 құрамындағы шиналарды сынауға уақыт жетпеді.

«Жаңа көлікпен жұмыс істегенде аэродинамикадан бастап, механикалық теңгерімге дейінгі барлық параметрлерді түсіну керек. Қысқа дайындық мерзімі бұл процесті қиындатады», — деп қосты Хэмилтон.

Соған қарамастан, пилот Ferrari көлігіне бейімделудегі ілгерілеуіне риза екенін жеткізді және маусымның алдағы кезеңдерінде жақсы нәтижелерге қол жеткізуге сенімді.