Грилиш «Ситиден» кетуі мүмкін — болашағы бұлыңғыр

Ағылшын футболшысы Джек Грилиштің «Манчестер Ситидегі» болашағы белгісіз күйде қалып отыр. Биылғы маусымда жартылай қорғаушы негізгі құрамдағы орнын жоғалтып, жазда клубтан кетуі ықтимал.

Рекордтық 100 миллион фунтқа «Астон Вилладан» ауысқан 29 жастағы ойыншы ағымдағы маусымда тек 16 матчты ғана бастапқы құрамда өткізді — бұл өткен маусыммен салыстырғанда екі есе аз. Жуырда өткен Англия Кубогының финалында «Кристал Пэласқа» қарсы ойынға да қосалқы құрамда қалып, алаңға шыққан жоқ. Дәл осындай жағдай былтырғы «Манчестер Юнайтедпен» болған финалда да қайталанған еді.

«Джекке жаным ашиды. Оған деген қарым-қатынас дұрыс емес. Ол — команда айналасына құруға болатын талант. Оның финалда ойнамағаны — қылмыс», — деді «Ситидің» бұрынғы қақпашысы Шей Гивен.

Бас бапкер Пеп Гвардиола Грилиштің болашағы жайлы нақты пікір айтпағанымен, шешімді клуб басшылығы мен футболшының агенттері бірлесіп қабылдайтынын айтты. Алайда ойыншының аптасына 300 мың фунт жалақысы жаңа клуб табуға елеулі кедергі болуы мүмкін.