Холланд Чемпиондар Лигасында жаңа рекорд орнатты

Футбол әлемінде жаңа рекордшы пайда болды. Championat.com хабарлауынша, “Манчестер Сити” шабуылшысы Эрлинг Холанд Чемпиондар лигасының тарихында 50 нәтижелі ұпайға ең жылдам жеткен ойыншы ретінде өз есімін жазды.

Норвегиялық шабуылшы бұл жетістікке бар болғаны 44 матчта қол жеткізді, бұл алдыңғы рекордшының көрсеткішінен аз. Қазіргі уақытта Холандтың активінде 45 гол және 5 нәтижелі пас бар.

Алдыңғы рекорд голландиялық шабуылшы Руд ван Нистелройға тиесілі болды. Ол “Манчестер Юнайтед” және “Реал Мадрид” сапында Чемпиондар лигасында гол+пас жүйесі бойынша 50 ұпай жинау үшін 45 матч өткізген.

Холанд бұл рекордты топтық кезеңнің 5-турындағы “Фейеноордқа” қарсы матчтың алғашқы таймында жаңартты. Бірақ шабуылшы мұнымен тоқтаған жоқ: ойынның 53-ші минутында тағы бір гол соғып, өзінің нәтижелі іс-қимыл көрсеткішін 51-ге жеткізді.

24 жастағы форвардтың бұл жетістігі оның еуропалық футболдың ең беделді клубтық турнирінде үздік деңгейде өнер көрсету қабілетін тағы бір рет дәлелдеді.