Геннадий Головкин өзінің алғашқы бапкерінің қазасына байланысты көңіл айтты

Olympic.kz хабарлағандай, Қазақстан Ұлттық Олимпиада комитетінің президенті Геннадий Головкин ҚР-ның бокстан еңбек сіңірген жаттықтырушысы Виктор Дмитриевтің қазасына байланысты көңіл айтты.

Қазақстан Республикасы Ұлттық Олимпиада комитетінің ұжымы атынан және жеке өз атымнан осы ауыр қазаға байланысты терең қайғырып көңіл айтамын. Бұл бүкіл спорт қауымдастығы үшін және жеке өзім, оның шәкірті үшін орны толмас қаза. Виктор Константинович тек көрнекті бапкер ғана емес — ол тәлімгер, ұстаз және үлгі тұтар тұлға болды. Оның спортқа деген адалдығы, кәсіби шеберлігі және әр адамға жол таба білу қабілеті мәңгі есімізде қалады. Ол Қазақстандағы бокстың дамуына өлшеусіз үлес қосып, талантты спортшылардың тұтас буынын тәрбиеледі.

Виктор Дмитриев Головкиннің боксшылық мансабындағы алғашқы ұстазы болды — олардың ынтымақтастығы Майқұдық ауданындағы №1 КПТМ спорт залында басталған.