Футзалдан ӘЧ 2024: Португалия қандай қарсылас?

Қазақстан мен Португалия арасындағы футзалдан Әлем чемпионатының 1/8 финалы қарсаңында Португалия құрамасының күшін және олардың жетістіктерін ерекше атап өту керек.

Португалия құрамасы әлемдегі жетекші футзал командаларының бірі саналады. 2018 жылдан бері олар қатарынан екі Еуропа чемпионатын жеңіп алды және қазіргі уақытта әлем чемпиондары болып табылады. Олардың бұл жетістіктері бас бапкері Жорже Браздың жетекшілігімен байланысты, ол 14 жыл бойы команданы басқаруда. Оның жоғары кәсіби деңгейі 2018-2022 жылдар аралығында қатарынан бес рет «Ұлттық командалардың үздік жаттықтырушысы» атағын иеленуімен дәлелденеді.

Португалия құрамасы негізінен елдің жетекші клубтары – «Спортинг» және «Бенфика» ойыншыларынан құралған. Негізгі ойыншылардың ішінде ерекше көзге түсетіндері: Пани Варела («Әл-Наср»), қақпашы Эду («Эль Позо Мурсия»), сондай-ақ капитан Жоау Матуш («Спортинг»). Оған қоса, жас талантты Зики Те («Спортинг») және қорғаушы Афонсу Жезуш («Бенфика») да командада маңызды рөл атқарады.

Әлем чемпионатының топтық кезеңінде Португалия өзінің мықтылығын көрсетті. Бірінші матчта олар Панаманы 10:1 есебімен ойсырата жеңді. Екінші ойында Тәжікстанмен тартыс өтті, бірақ Португалия 3:2 есебімен жеңіске жетті. Топтық кезеңнің соңғы матчында Марокконы 4:1 есебімен сенімді жеңді.

Португалия құрамасының жалпы статистикасы да өте әсерлі: соңғы 30 ресми матчта олар 28 жеңіске жетіп, тек бір ғана жеңіліс тапқан.

Қазақстан мен Португалия арасындағы өткен ресми матчтар үш кездесуден тұрады. Қазақстан құрамасы 2016 жылғы ЕУРО-ның іріктеу кезеңінде 3:1 есебімен жеңіске жетті. Екі команданың соңғы кездесуі 2021 жылғы әлем чемпионатының жартылай финалында өтті, онда негізгі және қосымша уақыт тең аяқталғаннан кейін, Португалия пенальти сериясында жеңіске жетті.

Алдағы 26 қыркүйектегі матч 1/8 финалдағы ең маңызды оқиғалардың бірі болмақ. Португалия фаворит саналғанымен, Қазақстан құрамасы ең мықты қарсыластарға да лайықты қарсылық көрсете алатын команда екенін әлдеқашан дәлелдеген.