Францияның бес теннисшісі келісілген матчтар үшін ұзақ мерзімге шеттетілді

Халықаралық теннис этикасы агенттігі (ITIA) Бельгияда жүргізілген тергеу нәтижесінде бес француз теннисшісіне қатаң жаза қолданды. Олар 2017–2018 жылдары аралығында келісілген матчтарға қатысқаны үшін түрлі мерзімге дисквалификацияланды.

Ең ауыр жаза Янник Тиванға тағайындалды — ол 22 матчты ұйымдастырғаны үшін өмір бойына теннистен шеттетілді және 75 мың доллар айыппұл арқалады. Бұған қоса, ол 37,4 мың еуро өтемақы төлеуі тиіс. Тиван бұған дейін ATP рейтингінде 590-орынға дейін көтерілген.

Қалған теннисшілерге берілген жазалар:

• Томас Брешемье — 11 матч үшін 7,5 жыл
• Габриэль Пети — 7 матч үшін 6,5 жыл
• Томас Сетоджи — 3 матч үшін 10 жыл
• Юго Даубиас — 2 матч үшін 2 жыл

Бұл бұзушылықтар армян-бельгиялық Григор Саргсян басқарған қылмыстық топ әрекет еткен кезде жасалған. Саргсян өзі 5 жылға бас бостандығынан айырылған болатын. ITIA бұл істе қылмыстық құрылымның теннис әлеміне қаншалықты терең енгенін атап өтті.