«Фиорентина» шабуылшысы Серия А матчы кезінде естен танып қалды

«Фиорентина» баспасөз қызметінің хабарлауынша, 24 жастағы шабуылшы Моизе Кин «Эллас Веронаға» қарсы 0:1 есебімен аяқталған сырт алаң матчында ауыр жарақат алды.

Екінші таймның ортасында (58-ші минутта) шабуылшы доп үшін таласта қорғаушы Павел Давидовичтің тізесімен басынан соққы алды. Алғашқы көмек көрсетілгеннен кейін ойыншы матчты жалғастырды, алайда 6 минуттан кейін кенеттен тепе-теңдігін жоғалтып, алаңға құлап түсті. Екі команданың ойыншылары дереу дәрігерлерді шақырды.

Ойынды тоқтатуға тура келді. Ағымдағы маусымда 15 гол соққан италиялық шабуылшы мойын бекіткішімен зембілге жатқызылып, тексеру үшін жедел ауруханаға жеткізілді.

Матч қайта басталғаннан кейін «Верона» жартылай қорғаушысы Антуан Бернеде қосымша уақыттың бесінші минутында жалғыз голды соқты.

Айта кетерлігі, бұл командада екінші осындай жағдай. Желтоқсанда «Интермен» ойын кезінде жартылай қорғаушы Эдоардо Бове естен танып қалған еді. Оған сәтті операция жасалып, жүрек тоқтап қалудың алдын алу үшін алмалы-салмалы дефибриллятор орнатылды.