Финляндия құрамасының қорғаушысы Стокпорт Каунтиге ауысты

Ағылшын клубы Стокпорт Каунти Финляндия құрамасының қорғаушысы Артту Хоскененмен келісімшартқа отырғанын жариялады, деп хабарлайды клубтың ресми сайты.

28 жастағы футболшы соңғы екі жарым маусымда Польшаның «Краковия» клубында 54 ойын өткізіп, екі гол соқты. Қорғаушының еншісінде Финляндия құрамасы сапында 18 ойын бар, сондай-ақ УЕФА Ұлттар лигасында Англия құрамасының қақпасына гол соққан.

«Бұл біздің селекциялық қызметіміздің үлкен еңбегі, олар лайықты ойыншыны барлық жерден іздеді. Өз мансабының шыңында тұрған Финляндия құрамасының ойыншысын қатарымызға қосқанымыз өте қуанышты», — деді бас бапкер Дэйв Чаллинор.

Хоскенен Лейтон Ориенттен плей-оффта жеңілгеннен кейінгі клубтың бесінші жаңа трансфері болды — команда жаңа маусымды Болтон Уондерерске қарсы үй ойынымен бастайды.