Финляндия әйелдер құрамасының бапкері 51 жастағы экс-футболшыны жас қорғаушымен шатастырды

Финляндия әйелдер құрамасының бас бапкері Оути Сааринен Сербияға қарсы Ұлттар лигасы матчына өтінім беруде күлкілі қате жіберді — ол 23 жастағы қорғаушы Нанне Руусканеннің орнына 51 жастағы Стина Руусканенді кездейсоқ құрамға қосты.

Қате өтінім беру мерзімі өткеннен кейін ғана анықталды, соның салдарынан жас футболшы 1:1 есебімен аяқталған ойынға қатыса алмады.

Айта кетерлігі, Стина Руусканен — өз тезкасының туысы емес, құрама сапында небәрі екі матч өткізіп, халықаралық мансабын шамамен 29 жыл бұрын аяқтаған.

«Егер шақыру келсе, әрине дайынмын! Кеше әуесқойлар лигасында матч ойнадым… сондықтан ойын сезімім жақсы», — деп жағдайды әзілмен түсіндірді Стина Ilta-Sanomat газетіне берген сұхбатында.

Финляндия футбол қауымдастығы Саариненнің мәлімдемесін жариялады: «Нанне, әрине, көңілі түсті, бірақ жағдайды ескере отырып, жаңалықты лайықты қабылдады. Өз қатем үшін қатты өкінемін».