Финалист пенальти сериясында анықталуы мүмкін – Атлетико мен Барселона арасындағы матчқа сарапшының болжамы

Сәуірдің 2-нен 3-не қараған түні Мадридтегі «Метрополитано» стадионында Испания Кубогының жартылай финалының жауапты матчы өтеді. Мадридтің «Атлетикосы» азулы «Барселонаны» қабылдайды.

Бірінші кездесуде командалар 4:4 есебімен тең тарқасты. Енді қарымта ойында кімнің финалға шығып, трофей үшін «Реал Мадридпен» кездесетіні анықталады.

Sport Pulse порталына сұхбат берген спорт журналисі Всеволод Хван алдағы матчқа қатысты болжамымен бөлісті:

«Атлетико» мен «Барселона» арасындағы жауапты кездесудің жеңімпазын болжау оңай емес. Бұл екі команда арасындағы матчтар тартысқа толы өтеді. Соңғы ойындарға қарасақ, бүгінгі текетірес голдарға бай болатын сияқты.

Бір жағынан, кубоктық форматта қазір «Атлетиконың» психологиялық басымдығы аздап жоғары болуы мүмкін. «Камп Ноуда» өткен бірінші кездесуде Диего Симеоне шәкірттері соңғы минуттарда таразы басын теңестіріп, жеңілістен аман қалды. Енді өз алаңында оларға жанкүйерлердің қолдауы көмектесуі тиіс.

Екінші жағынан, 17 наурызда Ла Лига аясында «Барселона» дәл осы мадридтік жанкүйерлердің алдында «Атлетиконы» жеңіп кеткен болатын. Сондай-ақ, каталондықтар 2025 жылы әлі бірде-бір матчта жеңілген жоқ. Соңғы рет Флик шәкірттері 2024 жылдың 22 желтоқсанында дәл осы «Атлетикоға» Испания чемпионатында есе жіберген еді. Демек, «матрасниктердің» бұрыңғы нәтижесін қайталап, «Барселонаның» жеңіліссіз сериясын үзуге мүмкіндігі бар.

Менің ойымша, алдағы ойын тең аяқталып, финалист пенальти сериясында анықталуы мүмкін».

Атлетико – Барселона матчына қатысты негізгі ақпарат

Турнир: Испания Кубогы, жартылай финал (қарымта кездесу)

Күні: 3 сәуір

Басталу уақыты: 00:30

Өтетін орны: «Метрополитано», Мадрид

Тікелей көрсетілім: SPORT+ QAZAQSTAN

Испания Кубогының тарихында есте қаларлық финалдар көп болған. Өткен жылы трофейді Бильбаоның «Атлетигі» жеңіп алды, ал бұл турнирде ең көп жеңіске жеткен команда – «Барселона» (31 мәрте). «Атлетико» 10 рет топ жарған, соңғы рет – 2013 жылы. «Матрасниктер» араға 11 жыл салып финалға қайта орала ала ма? Мұны жақын арада білетін боламыз!

Басты сурет: Photo by David Ramos/Getty Images

Біздің парақшамыздан футбол матчтарының барлық нәтижелерін Live форматта бірінші болып біліңіз!