Евгений Аверченко: «Қайрат» бұл жолы жеңілуі керек еді

Қазақстан құрамасының бұрынғы ойыншысы, ел чемпионы және Суперкубок иегері Евгений Аверченко ҚПЛ-2025 тоғызыншы туры жайлы пікір білдірді.

Сарапшының айтуынша, «Оқжетпеске» қарсы матчта «Ақтөбеге» жеңіс әкелген — Жайро Жанның шеберлігі. Ал «Атырау» өз алаңында «Жетісумен» кездесуде соңғы минутта таразы басын теңестіріп, заңды нәтижеге жетті.

«Астананы» фаворит ретінде атап өткен Аверченко: «Қиындықтарға қарамастан, бұл — чемпиондық үшін күресетін команда. Құрам жағынан да ‘Астана’ ‘Ұлытаудан’ әлдеқайда мықты», — деді.

Ол «Жеңіс» пен «Қызылжар» арасындағы нөлдік тең есепті әділетті нәтиже деп бағалады. «Қайсардың» маусымдағы алғашқы жеңісі де назардан тыс қалмады — команда өз алаңында «Тұранды» 1:0 есебімен ұтты.

Турдың басты сенсациясы — «Елімайдың» «Қайратты» жеңуі болды.

«Қайрат қашан да жеңілуі керек еді. Чемпионатта барлық матчты ұту мүмкін емес, әсіресе сырт алаңда ‘Елімаймен’ ойнағанда», — деді Аверченко.

«Тобыл» — «Ордабасы» матчы ауа райының қолайсыздығына байланысты кейінге шегерілген.