Эниола Алуко: Әйелдер футболында әйелдерге мүмкіндік берілуі тиіс

BBC хабарлауынша, Англия әйелдер құрамасының бұрынғы ойыншысы Эниола Алуко әйелдер футболына ер сарапшылардың шамадан тыс араласуы туралы алаңдаушылық білдірді.

Оның айтуынша, ер адамдарға әйелдер футболын талдауға мүмкіндік берілгенімен, бұл әйел комментаторлар мен сарапшылардың мүмкіндігін шектемеуі керек. Пікірталасқа «Арсеналдың» экс-шабуылшысы Иан Райттың Англия әйелдер құрамасының матчтарында тұрақты сарапшы ретіндегі қызметі себеп болды.

– Ианмен ұзақ уақыт жұмыс істедім, оны кәсіби маман ретінде жоғары бағалаймын. Бірақ ол әйелдер футболындағы өз рөлінің ауқымын түсінгені жөн, – деді Алуко.

Ол спорттық журналистикада орындар шектеулі екенін айтып, ерлер футболындағы әйел сарапшылар саны аз болса, керісінше жағдайда да тең мүмкіндік болуы керек екенін еске салды.

– Әйелдер футболы әлі де даму сатысында. Сондықтан бұл саладағы шектеулі мүмкіндіктерді ер адамдар иеленбеуі керек. Әйелдер өз футболын өздері таныстырып, сараптама жасайтын деңгейге жетуі қажет, – деді Эниола Алуко.