Джо Роган Хабибті UFC тарихындағы ең мықты жеңіл салмақтағы спортшы деп санамайды

Белгілі UFC комментаторы Джо Роган Хабиб Нурмагомедовтің ММА тарихындағы ең үздік жеңіл салмақтағы спортшы екендігі туралы пікірмен келіспейтінін білдірді, деп хабарлайды Fighttime.ru.

Роганның айтуынша, бұл атақ 2008-2010 жылдары UFC-дегі жеңіл салмақ чемпионы болған Би Джей Пеннге көбірек лайық.

Адамдар Хабибті барлық уақыттағы ең мықты жеңіл салмақтағы спортшы деп санайды, бірақ мен Джо Стивенсон мен Шон Шеркпен жұдырықтасқан кездегі Би Джей Пеннді кез келген қарсыласқа қарсы қоя алар едім. Ол Диего Санчеспен төбелескенде, оны тоқтату мүмкін емес еді. Оның партерде керемет ойыны және элиталық кикбоксингі болды, — деді Роган өзінің подкастында.

Пенн сондай-ақ 2004 жылы Мэтт Хьюзді жеңіп, жартылай орта салмақта чемпион атанған. Алайда 2011 жылдан бастап сәтсіздіктерге ұшырап, алты жыл бұрын қатарынан жеті жеңілістен кейін UFC-ден кетті.