Джейдон Санчо қайтадан Дортмундқа оралуы мүмкін

Англиялық «Манчестер Юнайтедтің» вингері Джейдон Санчоның мансабы қайтадан Бундеслигамен түйісуі мүмкін. Дортмундтық «Боруссия» 25 жастағы футболшыны қайта қатарға қосу мүмкіндігін қарастырып жатыр.

Өткен маусымды Санчо жалдау негізінде «Челси» сапында өткізген еді. Алайда лондондық клуб футболшының трансферін толық сатып алуға келісе алмады, сол себепті жазда ол «Юнайтедке» қайта оралды.

Sky Sports мәліметінше, «Боруссия» әзірге ресми ұсыныс жібермегенімен, ойыншының айналасындағы жағдайды жіті бақылап отыр. Қайтадан арендаға алу нұсқасы да жоққа шығарылмайды, дегенмен «Манчестер Юнайтед» Санчоны сатуды жөн көреді.

Ағылшын клубы ойыншымен £25 миллионнан төмен бағаға да қоштасуға дайын — бұл сома бұған дейін «Челси» үшін келісілген трансферлік құн еді.

Айта кетейік, Санчоға бұған дейін «Наполи» мен «Ювентус» тарапынан қызығушылық болған, бірақ қазір Италияға ауысу ықтималдығы аса жоғары емес.

Біздің парақшамыздан футбол матчтарының барлық нәтижелерін Live форматта бірінші болып біліңіз!