Дінмұхаммед Райымқұл — жасөспірімдер арасында әлем чемпионы

Бүгін Дінмұхаммед Райымқұл Алматы қаласында «Шымбұлақ» тау шаңғы курортында өтіп жатқан фристайл-акробатикадан жасөспірімдер арасындағы әлем чемпионатында жеңімпаз атанды, деп хабарлайды ҚР Туризм және спорт министрлігі Спортты дамыту дирекциясының баспасөз қызметі.

Бұл — Қазақстанның фристайл-акробатикадан жасөспірімдер арасындағы әлем чемпионатында қол жеткізген алғашқы алтын медалі.

Дінмұхаммед бүгін финалда 104.52 ұпай жинады. Күміс пен қола медаль қытайлық (Юч Юнхен, Ян Чжичэн) спортшыларда. Әйелдер арасында барлық жүлдені Қытай акробаттары иеленді.

Таңертең іріктеуде Ұлттық құрама спортшысы 4-сатыға тұрақтап, ақтық сынға жолдама алған. Ал әйелдер арасында 7-сатыға тұрақтаған отандасымыз Ардана Маханованың финалға шығуына аз ұпай жетпей қалды.
Еске сала кетейік, Алматыдағы чемпионатта 16 мемлекеттің командасы сынға түсіп жатыр. Жарыс ертең мәресіне жетеді.