Қазақстандық футбол менеджментіндегі жас әрі білікті маман Дидар Бақытбекұлы Сыдықбек «Атырау» футбол клубының бас менеджері болып тағайындалды.
32 жастағы Алматылық экс-футболшы карьерасында «Қызылжар», «Астана-1964», «Ақтөбе» және «Ордабасы» клубтарының намысын қорғап, кейіннен футбол менеджменті мен талдау саласында табысты еңбек етті. Ол «Прогресс KZ» талдау қызметінің жетекшісі, «ИТЦ» АҚ бақылау бөлімінің маманы және «Қазақстан Республикасы Тұңғыш Президенті – Елбасы қорының» жобалық кеңсе үйлестірушісі қызметтерін атқарған.
Футболдағы басқарушылық мансабын SD Family Group директоры ретінде бастап, өзінің ұйымдастырушылық қабілеті мен стратегиялық көзқарасының арқасында Қазақстан Медиа-футбол федерациясының президенті деңгейіне дейін көтерілді. Сонымен қатар, ол «Астана» футзал клубының директоры қызметін атқарып, команданың дамуына зор үлес қосты. Сондай-ақ, Қазақстан футбол федерациясы жүзеге асырған «Алаң» инфрақұрылымдық жобасының кеңесшісі ретінде де маңызды еңбек етті.
