Дэн Баллардтың соңғы минуттағы голы «Сандерлендті» финалға шығарды

«Стэдиум оф Лайт» стадионында өткен Чемпионшип плей-офф жартылай финалында Дэн Баллард 122-минутта баспен гол соғып, «Сандерлендті» плей-офф финалына алып шықты. Екі кездесудің қорытынды есебі 3:2 болды.

Негізгі ойын уақыты аяқталып, матч пенальти сериясына жақындап қалған кезде Баллардтың баспен бағыттаған добы қақпа маңдайшасына тиіп, қақпа торына түсті.

Кездесу барысында «Ковентри» сапынан Эфрон Мейсон-Кларк 76-минутта есеп ашты. Қонақтар екінші таймда басым ойнады. Негізгі уақыттың соңында Хаджи Райт есепті еселеуге нақты мүмкіндік алғанымен, сәтті пайдалана алмады.

«Сандерлендтің» бас бапкері Режис Ле Бри ойыннан кейін өз командасының негізгі уақытта қобалжығанын мойындады:
«Бұл керемет сценарий болды. Қосымша уақытта біз өз футболымызды көрсете алдық».

Ал «Ковентри» бапкері Фрэнк Лэмпард былай деді:
«Біз екі матчта да жақсырақ ойнадық. Жігіттер командаға жанын салды. Олар маусым барысында ұжымды 17-орыннан көтеріп, осы кезеңге жеткізді».