Давид Годю «Тур Оман» жарысының үшінші кезеңінде жеңіске жетті

Веложарыстың ресми сайтының хабарлауынша, дүйсенбі күні «Тур Оман» көпкүндігінің үшінші кезеңі аяқталып, француз велошабандозы Давид Годю (Groupama-FDJ) жеңімпаз атанды.

Фанджадан Шығыс Тауына дейінгі 180,8 шақырымдық кезеңде Годю 4 сағат 16 минут 10 секунд көрсеткішпен мәреге бірінші болып жетті. Одан небәрі 1 секунд кейін британдық Адам Йейтс (UAE Team Emirates-XRG) келсе, австралиялық Дамьен Хоусон (Q36.5 Pro Cycling Team) үздік үштікті 5 секунд айырмашылықпен түйіндеді.

«Астана» командасының велошабандоздары да жақсы нәтиже көрсетті: Диего Улисси мен Ваут Пулс сәйкесінше 8-ші және 10-шы орындарды иеленді (+23 секунд).

Қазақстандық команданың басқа өкілдерінің нәтижелері:

• Хенок Мулубрхан — 21-ші орын (+49 сек)
• Антон Чармиг — 44-ші орын (+2:25)
• Николас Винокуров — 63-ші орын (+5:35)
• Давиде Тонеатти — 71-ші орын (+7:15)
• Макс Кантер — 106-шы орын (+9:53)

Жалпы есепте Давид Годю 13 сағат 28 минут 26 секунд нәтижемен көш бастап тұр. Одан 6 секунд артта Адам Йейтс келе жатса, Дамьен Хоусон 12 секунд айырмашылықпен үшінші орында. «Астана» велошабандоздары Улисси мен Пулс жалпы жіктемеде 8-ші және 9-шы орындарды иеленуде.