Даниэль Леви 24 жылдан кейін «Тоттенхэм» төрағасы қызметінен кетті

Даниэль Леви лондондық клубты 24 жыл басқарғаннан кейін «Тоттенхэмнің» атқарушы төрағасы қызметінен кетті.

«Мен атқарушы командамен және барлық қызметкерлермен бірге атқарған жұмысымды мақтан тұтамын. Біз бұл клубты жоғары деңгейде бәсекелесетін жаһандық алпауытқа айналдырдық. Одан да маңыздысы — біз нағыз қауымдастық құрдық», — деді Леви.

Оның басшылығымен клуб заманауи «Тоттенхэм Хотспур» стадионына көшіп, өткен маусымда Еуропа Лигасын жеңіп, 17 жылдық трофейсіз кезеңді аяқтады.

Алайда соңғы жыл оңай болған жоқ — команда Премьер-лигада 17-ші орын алып, жанкүйерлер клуб басшылығына қарсы наразылық акцияларын жиі өткізді.

«Тоттенхэмнің» жаңа атқарушы емес төрағасы болып Питер Чаррингтон тағайындалды, ол бұған дейін клуб иесі ENIC компаниясының директорлар кеңесінің мүшесі болған.