Дамир Жафяров «Барысқа» қосылады

Shaiba.kz порталының мәліметі бойынша, ресейлік шабуылшы Дамир Жафяров астаналық “Барыс” командасымен алдағы көшпелі матчтарға қатысады. 30 жастағы хоккейші Құрлықтық хоккей лигасының (ҚХЛ) осы маусымында әзірге нәтижелі ойын көрсете алмады, бес кездесуінде бірде-бір ұпай жинаған жоқ.

Дегенмен, Жафяровтың ҚХЛ-да мол тәжірибесі бар екенін ескеру керек. Өткен маусымда ол “АҚ Барс” сапында 16 ойын өткізіп, бір гол мен бір нәтижелі пас арқылы 2 ұпай жинады. Кейін ол Омбының “Авангард” клубына ауысып, сол жерде өзінің көрсеткіштерін едәуір жақсартты. Жаңа командасы үшін 25 матчта 4 гол соғып, 11 нәтижелі пас берген, осылайша 15 ұпай жинады.

Плей-офф кезеңінде де Жафяров сенімді ойын көрсетіп, 12 ойында 4 голдық паспен көзге түсті. Енді “Барыс” жанкүйерлері тәжірибелі шабуылшының көшпелі матчтарда жақсы ойын көрсетіп, командаға өз үлесін қосады деп үміттенеді.