«Челсиге» жеңіс ауадай қажет – сарапшы АПЛ-да «Тоттенхэмге» қарсы өтетін матч туралы

Бүгін түнде Англия чемпионатының 30-турында «Челси» өз алаңында «Тоттенхэмді» қабылдайды.

Статистика:

• Қос команда 178 рет кездесті. 80 матч «Челсидің» жеңісімен аяқталған. 55 ойында «Тоттенхэмнің» мерейі үстем болды. Ал 43 кездесуде тең есеп тіркелген.
• АПЛ-да өткен қос команда арасындағы соңғы 10 кездесуде «Челси» 7 рет жеңіске жетіп, 1 ойында ұтылған, 2 матч тең аяқталды.
• «Стэмфорд Бридж» стадионында өткен соңғы 5 кездесуде алаң иелері 3 рет жеңіске жетіп, 2 ойында тең түсті.

Сарапшы пікірі

Sport Pulse порталына сұхбат берген спорт журналисі Всеволод Хван алдағы матчқа қатысты болжамымен бөлісті:

«Англия Премьер-лигасының 30-туры аясында өтетін «Челси» мен «Тоттенхэм» арасындағы матчта фаворит – «көктер». Кезекті лондондық дерби сөзсіз тартысқа толы болмақ.

Екі команда да ұзақ уақыттан кейін сапқа оралған ойыншыларына сенім арта алады. «Челсиде» Николас Джексон, Нони Мадуэке және Коул Палмер жарақаттан айықты. «Тоттенхэмде» Ришарлисон жаттығу жұмыстарына кірісті, ал Викарио мен Ромеро өз бабында.

«Челси» үшін бұл матчтың маңызы зор: команда төртінші орында тұр және Чемпиондар лигасына жолдама үшін күресуде. Төменнен «Манчестер Сити» қуып келеді. Маусымның белгілі бір кезеңінде Энцо Мареска шәкірттері чемпиондыққа таласа алады деген пікір болған, алайда кейін нәтижелері төмендеп кетті. Енді ЛЧ аймағындағы орнын сақтап қалу оңай болмайды, тіпті Чемпиондар лигасына шығу үшін бесінші орын да жеткілікті болуы мүмкін екенін ескерсек.

Ал «Тоттенхэм» үшін бұл сәтсіз маусым. Дегенмен, АПЛ-дан «ұшып» кету қаупі жоқ. Жақсы жағдайда алғашқы ондыққа ене алады. Тер төгіп, күресетіндей нәрсе жоқ. Сондықтан бұл матчта жеңіске әлдеқайда мұқтаж команда – «Челси». Энцо Мареска шәкірттеріне ол ауадай қажет».

Матч туралы басты ақпарат

Турнир: Англия чемпионатының 30-туры

Күні: 4 сәуір

Уақыты: 00:00

Стадион: «Стэмфорд Бридж», Лондон

Тікелей көрсетілім: Setanta Sports

Басты сурет: globallookpress.com/IMAGO/David Klein

Біздің парақшамыздан футбол матчтарының барлық нәтижелерін Live форматта бірінші болып біліңіз!