Chelsea Supporters’ Trust Премьер-лиганың атқарушы директоры Ричард Мастерске ашық хат жолдады. Ұйым «Челсидің» бірлескен иесі Тодд Боэлидің Vivid Seats билет қайта сату платформасымен байланысын тергеуді сұрап отыр.
Жанкүйерлер бұл жағдайда мүдделер қақтығысы барын алға тартуда. Боэли клуб акциясының 13% иесі бола тұра, Vivid Seats компаниясының да директоры әрі инвесторы. Ал бұл платформа Премьер-лиганың ресми емес билет сатушы ретінде танылып, тыйым салған сайттарының қатарына кіреді.
«Біздің көптеген мүшелеріміз бұл байланысқа наразы. Боэлидің Vivid Seats-қа қатысуы клубтың, Премьер-лиганың және полицияның билет қайта сатушылармен күресу жұмысына толықтай кедергі келтіреді», — делінген CST хатында.
Vivid Seats шетелдік жанкүйерлерге билеттерді 90-нан 20 000 фунт стерлингке дейінгі бағамен ұсынады. Алайда «Челсидің» ресми сайты жанкүйерлерді бейресми сатушылардан билет алмауға шақырады, себебі олар жарамсыз деп есептеледі.
CST бұл мәселеге Ұлыбританияның Мәдениет, медиа және спорт департаментінің назарын аударды. Ұйым Боэлидің бұл жағдайға қатысты сұрақтарды не ашық, не жеке форматта талқылаудан бас тартып отырғанын да атап өтті.
Біздің парақшамыздан футбол матчтарының барлық нәтижелерін Live форматта бірінші болып біліңіз!
