Чебурин командасы Литва чемпионатында күтпеген жерден ұпай жоғалтты

Қазақстандық маман Владимир Чебуриннің жетекшілігіндегі Вильнюс «Жальгирисі» Литва чемпионатының 13-ші тур матчында үмітті ақтамады — елдің қазіргі чемпионы біріншіліктің аутсайдері «Дайнавамен» тең түсті.

Қонақтар 37-ші минутта есеп ашты — Артем Бафталовский мергендік танытты. Үй иелері 65-ші минутта Гедрюс Матулявичустың дәл соққысының арқасында есепті теңестірді — 1:1.

«Жальгирис» үшін жағдай Том Басиланың алаңнан қуылуынан кейін қиындай түсті, команда азшылықта қалды. Айта кетейік, бұған дейін Чебуриннің шәкірттері «Кауно Жальгиристен» 2:4 есебімен жеңіліп, Литва Кубогындағы өнерін аяқтаған болатын.