Бублик ATP маусымындағы жеңістер бойынша жеке рекордын орнатты

Championat.com мәліметтері бойынша, әлемнің 16-шы ракеткасы Александр Бублик ағымдағы маусымда ATP турнирлерінің негізгі кестесінде 34 жеңіске жетіп, жеке рекордын орнатты.

Қазақстандық теннисші төрт жыл бұрынғы көрсеткішін — 2021 жылғы 33 жеңісін жаңартты. Спортшы мерейтойлық жеңісін Париж «Мастерсінде» тіркеді, онда бірінші айналымда әлемнің 47-ші ракеткасы австралиялық Алексей Попыринді 6:4, 6:3 есебімен жеңді.

Келесі кезеңде Бублик француз Корентен Муте мен америкалық Райлли Опелка жұбының жеңімпазымен кездеседі. Турнирдің қазіргі чемпионы — өткен жылғы финалда француз Уго Умберді жеңген неміс Александр Зверев.