Бұрынғы «Уотфорд» бапкері «Плимут Аргайлды» басқарады

«Плимут Аргайл» Том Клеверлиді бас бапкер қызметіне тағайындағанын клубтың ресми сайты хабарлады. 35 жастағы маман 1-ші Лигаға түсіп кеткен командамен үш жылдық келісімшартқа отырды.

Клеверли неміс «Шалькесінде» жұмыс істеу үшін кеткен Мирон Мусличтің орнын басты. Ағылшын маман «Уотфордты» 14 ай басқарды — бұл 2019 жылдан бері клубтағы бапкердің ең ұзақ мерзімі.

«Біз Томды бас бапкер қызметіне үміткер ретінде бірден анықтадық. Келіссөздер барысында оның көзқарасы клубтың мақсаттарымен толық сәйкес келетіні анық болды», — деді «Плимут» төрағасы Саймон Халлетт.

«Манчестер Юнайтед» пен «Эвертонның» бұрынғы жартылай қорғаушысы «Уотфордтың» бапкері ретінде 60 матч өткізді — 20 жеңіс, 14 тең ойын және 26 жеңіліс. Енді маманның алдында «Плимутты» Чемпионшипке қайтару міндеті тұр.