Бұл тосын сыйға толы ойын болады – комментатор Димаш Төлегенов алдағы «Тұран» – «Оқжетпес» матчы жайлы

Жаңа маусым басталды, және алғашқы турдан-ақ бізді «Тұран» мен «Оқжетпес» арасындағы тартысты кездесу күтіп тұр. 2 наурызда «Түркістан Аренада» алаң иелері өз жанкүйерлерінің қолдауын пайдаланып, чемпионатты жеңіспен бастауға тырысады. Ал Көкшетаудан келген қонақтар құрамдағы өзгерістерге қарамастан, жоғары лигада өз орнын сақтап қалуға дайын екенін дәлелдеуге ниетті.

Sport Pulse порталына эксклюзивті сұхбат берген спорт журналисі және комментатор Димаш Төлегенов командалардың мүмкіндіктері мен алдағы матч жайлы ойымен бөлісті.

— Димаш, бұл кездесуден не күтеміз?

— Бұл тосын сыйға толы матч болады. «Тұран» да, «Оқжетпес» те – жұмбақ командалар. Оларды медальға үміткерлер қатарына қарастыру қиын, бірақ дәл осындай ойындар премьер-лигадағы орын үшін күрестің негізін қалайды.

— Командалардың құрамы қаншалықты өзгерді?

— Айтарлықтай өзгерді. «Оқжетпес» үшін бұл заңдылық: Бірінші лигадағы жетістіктен кейін команда премьер-лига деңгейіне сай келуі үшін құрамын жаңартуға мәжбүр болды. «Тұран» да өзгерістерді бастан өткерді және өткен маусым қорытындысы бойынша элитадағы орнын сақтап қалды.

— Жанкүйерлер тартымды ойын күте ала ма?

— Бұл кездесу күтпеген жайттарға толы болмақ, бірақ кең аудитория үшін аса тартымды болмауы мүмкін. Дегенмен, екі команда үшін де бұл ойын өте маңызды, өйткені олар алғашқы ұпайларын еншілеуге және маусымдағы болашақ перспективаларын айқындауға тырысады.

«Тұран» – «Оқжетпес» матчы 16:00-де басталады. Ойынды KFF League YouTube-арнасынан тікелей эфирде тамашалай аласыз.

Басты сурет: instagram.com/fcokzhetpes