«Брайтон» иесі Тони Блум шотландиялық «Хартс» клубының 29% акциясын сатып алуға ұсыныс жасады

Ағылшын Премьер-лигасындағы «Брайтон энд Хоув Альбион» клубының иесі Тони Блум «Харт оф Мидлотиан» командасының 29% акциясын сатып алуға ниетті. Мәміленің құны шамамен 10 миллион фунт стерлингті құрайды.

Клубтың негізгі акционері — жанкүйерлерге тиесілі Foundation of Hearts ұйымы ұсынысты мамыр соңына дейін қарастырады. Акциялардың дауыс беру құқығы жоқ түрі сатып алынбақ — бұл бақылау пакетіне әсер етпейді. Мәміле мақұлданса, Блумның өкілі директорлар кеңесіне қосылады.

Тони Блум:

«Мен Эдинбург клубының тарихындағы жаңа кезеңнің бір бөлігі болғым келеді. „Хартс“ шотланд футболындағы күштер тепе-теңдігін өзгерте алады».

Foundation of Hearts мәмілені мақұлдауға кеңес береді, бірақ соңғы шешімді ұйым мүшелері дауыс беру арқылы қабылдайды.

Блум инвестиция жеке сипатта екенін және «Хартс» «Брайтонның» немесе оның қатысы бар «Юнион Сент-Жиллуаздың» фарм-клубына айналмайтынын атап өтті.