«Брайтон» 35 миллион еуроға 18 жастағы грек шабуылшысын сатып алды

«Брайтонның» ресми сайтының мәліметінше, клуб Харалампос Костуласты трансферлеу туралы келісімге келді — жас шабуылшы 1 шілдеде ағылшын командасына ауысады.

«Олимпиакостың» тәрбиеленушісі грек шабуылшысы бес жылдық келісімшартқа қол қояды — ауысу барлық қажетті рәсімдер аяқталғаннан кейін жүзеге асады.

Өткен маусымда Костулас өз клубына алтын дубль жасауға көмектесті — команда Грекия чемпионаты мен Кубогын жеңіп алды. Барлық турнирлердегі 35 ойында 18 жастағы футболшы жеті гол соғып, екі голдық пас берді.

Трансфер сомасы 35 миллион еуроны құрайды, тағы 2 миллион еуроны «Олимпиакос» бонус ретінде ала алады.