Бейбіт Жұқаев: «Форхэнд менің қаруыма айналды»

1-ші ақпанда, қазақстандық теннисші Бейбіт Жұқаев Астанадағы Beeline Arena кортында пәкістандық Хузайфа Абдул Рехманға қарсы өнер көрсетеді. Бұл кездесу Дэвис Кубогының бірінші әлемдік тобының плей-офф кезеңі аясында өтпек.

Маңызды матч қарсаңында ол Sport Pulse басылымына өзінің ойын мәнері мен мансабындағы негізгі кезеңдер туралы айтты.

Ойын мәнері мен мықты тұстары

Мен бірінші кезекте допты ойынға қосуда басымдық танытуға тырысамын, өйткені бойым ұзын және жалпы ойын мәнерім агрессивті. Әрқашан ойынды өзім басқаруға тырысамын, қарсыласымның қателігін күтпей, бірінші шабуыл жасауды қалаймын. Менің бэкхенд соққым жақсы, форхэнд те қаруыма айналды. Жалпы, өзімді әмбебап ойыншы деп санаймын, бірақ әрдайым жетілдіретін тұстар бар. Күнделікті техникамды, физикалық дайындығымды және психологиялық тұрақтылығымды жақсартуға күш саламын.

Мансап жолындағы маңызды кезеңдер

Мен 9 жасымнан бастап тенниспен айналыса бастадым, ал биыл 25-ке толамын. Кішкентай кезімнен көп еңбектендім, ата-анам маған үлкен қолдау көрсетіп, қомақты қаржы құйды. Кейінірек маған Қазақстан теннис федерациясы жәрдем берді, сол үшін үлкен алғысымды білдіремін. Теннисте тек еңбек пен табандылық қана емес, сәттілік, мықты команда және кәсіби бапкерлер де маңызды рөл атқарады. Менде барлығы керемет болды деп айта алмаймын, бірақ барлық мүмкіндіктерді пайдалануға тырыстым. Қазір дұрыс жолдамын және әрі қарай да тер төгуге әзірмін.

Дэвис Кубогы: Қазақстан vs Пәкістан

Қазақстан мен Пәкістан құрамалары арасындағы матчтар 1-2 ақпан күндері Астанадағы Beeline Arena-да өтеді. Бірінші ойын күні қазақстандық теннисшілерден алғаш болып кортқа Александр Шевченко шығады. Оның қарсыласы Музамиль Муртаза болмақ. Осы матчтан кейін Бейбіт Жұқаев пен Хузайфа Абдул Рехман күш сынасады.
2-ші ақпанда, екінші ойын күні, Александр Шевченко Тимофей Скатовпен бірігіп, Акел Хан/Музамиль Муртаза жұбына қарсы өнер көрсетеді. Осыдан кейін екі жекелей кездесу өтпек: Александр Шевченко – Хузайфа Абдул Рехман және Бейбіт Жұқаев – Музамиль Муртаза.

Сурет авторы: Андрей Ударцев