Бек Төлеу: «Интер Майами» топтан шыға алмайды»

Маусымның 19-нан 20-на қараған түні Клубтар арасындағы әлем чемпионатының А тобының екінші туры аясында «Интер Майами» клубы «Порту» аяқдопшыларымен кұш сынасады. Алғашқы турда «Интер Майами» — «Әл-Ахлимен», ал «Порту» — «Палмейраспен» 0:0 есебімен тең түсті.

Sport Pulse порталына берген сұхбатында спорт журналисі, сарапшы және комментатор Бек Төлеу алдағы ойынға қатысты пікір айтты.

— «Интер Майами» мен «Порту» алғашқы турда гол соға алмады. Бұл олардың шабуылдағы әлсіздігін көрсете ме, әлде қарсыластарының қорғанысы тым мықты болды ма?

— Қысқаша айтқанда, А тобындағы екі ойында да есеп ашылмады, барлық команда бір ұпайдан еншіледі. Бірақ бұл тек шабуылдағы әлсіздік емес. Мысалы, «Интер Майамидің» аргентиналық қақпашысы матчтың үздігі атанды, ол пенальти қайтарып, «Әл-Ахлиге» жеңіске жетуге мүмкіндік бермеді. Демек, кейде қақпашы шеберлігі де шешуші рөл атқарады.

— Месси бастаған «Интер Майами» жұлдыздары алғашқы ойында өз деңгейін көрсете алды ма? Олардың ойынына қандай баға бересіз?

— «Интер Майамиде» аты дардай жұлдыздар жеткілікті – Месси, Суарес, Бускетс, Жорди Алба. Бірақ бұл футболшылардың шарықтау шегі артта қалды. Олар баяу, жылдамдық жетіспейді. Сондықтан еуропалық деңгейдегі қарсыластармен ойнау қиынға соғады. Бұл жастағы ойыншылардың физикалық әлеуеті бұрынғыдай емес.

— «Порту» еуропалық тәжірибесі бар клуб ретінде «Палмейрасқа» қарсы ойында қандай мүмкіндіктерді жіберіп алды?

— «Порту» мен «Палмейрас» бір-біріне ұқсас командалар – тілдері де, стильдері де жақын. Бұл матчта нақты бір басымдық байқалмады. Алайда «Портудан» көбірек күткендер көп болды, себебі олар – Еуропа өкілі. Бірақ олар да шешуші сәттерде нақты мүмкіндіктерді пайдалана алмады.

— Екі команда да келесі кезеңге өту үшін тек жеңісті ойлау керек. Осы матчта шешуші фактор не болады деп ойлайсыз?

— Матч тағдырын анықтайтын фактор – физикалық дайындық пен жылдамдық. Бұл тұрғыдан «Портуның» артықшылығы бар. Ал «Интер Майамидің» жұлдыздары баяу, сондықтан ойын қарқыны жоғары болса, олар қиналуы мүмкін.

 — А тобында қай команда плей-оффқа шығуға басты үміткер болып тұр? «Интер Майами» мен «Порту» арасындағы ойын турнир тағдырына қаншалықты әсер етеді?

 — Бұл топ өте қызықты, себебі төрт команда – төрт құрлық өкілі: «Интер Майами» – Солтүстік Америка, «Палмейрас» – Оңтүстік Америка, «Порту» – Еуропа, «Әл-Ахли» – Африка. Қазірше «Порту» мен «Палмейрастың» келесі кезеңге өту мүмкіндігі жоғарырақ. Ал «Интер Майами» үшін бәрі осы ойында шешілуі мүмкін, бірақ олар топтан шыға алмауы да ықтимал.