«Бавария» аңызы Томас Мюллер клубтан кететінін жариялады

Мюнхендік «Баварияның» аңызға айналған жартылай қорғаушысы Томас Мюллер клубтан кететінін ресми түрде жариялады. 35 жастағы футболшының айтуынша, клуб басшылығы келесі маусымға жаңа келісімшарт ұсынбау туралы шешім қабылдаған.

«Клуб менімен жаңа келісімшарт туралы келіссөздер жүргізбеуге саналы түрде шешім қабылдады. Бұл менің жеке қалауыма сәйкес келмесе де, клубтың өз сенімдерін ұстануы маңызды. Мен бұл қадамды құрметтеймін», — деді Мюллер жанкүйерлерге арналған үндеуінде.

Томас Мюллер «Бавария» жүйесінде 2000 жылдан бастап өнер көрсетіп келеді. Осы уақыт аралығында ол команданың маңызды ойыншысына айналып, келесі ірі жетістіктерге қол жеткізді:

•  Бундеслиганың 12 мәрте чемпионы
•  Германия Кубогының 6 иегері
•  Елдің Суперкубогын 8 рет ұтқан
•  Чемпиондар Лигасында 2 мәрте жеңіске жеткен
•  Еуропа Суперкубогын 2 рет иеленген
•  Клубтар арасындағы әлем чемпионатын 2 мәрте ұтқан

«Мен «Баварияда» ұзақ болуыма қатысы бар барлық адамға алғысымды білдіремін. Қазір біз маусымдағы спорттық мақсаттарымызға толығымен назар аударып отырмыз», — деп түйіндеді ол.