«Барыс» тәжірибелі шабуылшысымен келісімшартын ұзартты

«Барыс» тәжірибелі шабуылшы Роман Старченкомен бір жылдық, 2026 жылдың 31 мамырына дейін есептелген біржақты келісімшартқа қол қойды.

Қазақ хоккейшісі клуб сапында 17-ші маусымын өткізеді. Старченко – КХЛ тарихында бір команда құрамында ең көп матч өткізген ойыншы (810) және Лигадағы 800 ойыннан асқан санаулы спортшылардың бірі.

Өткен маусымның тұрақты чемпионатында капитан 27 ойында 12 (4+8) ұпай жинады. Қазір ол «Барыс» тарихындағы екінші үздік сұрмерген саналады – оның еншісінде 211 шайба бар.