Барселонада шиеленіс: бапкер қақпашыны кешіккені үшін шеттетті

Diario Sport мәліметінше, 25 жастағы қақпашы Иньяки Пенья «Барселонада» қиын жағдайға тап болды. Каталон клубының тәрбиеленушісі Марк-Андре тер Штегеннің жарақатынан кейін негізгі қақпашы рөлін атқарды. Алайда ол «Атлетикпен» өтетін Суперкубок жартылай финалына дайындық жаттығуына кешігіп, команда ішінде сынға ұшырады. Осы оқиғадан кейін бас бапкер Ханси Флик қатаң шешім қабылдап, қаңтардың ортасынан бері Пеньяны ойындарға шығармады.

«Испанияда басқа менталитет бар шығар, бірақ кәсіби ойыншылар уақытында келуі керек», – деді Флик қақпашының түсініктемесіне жауап ретінде.

Бапкер өзін-өзі сынға алуы жеткіліксіз деп санап, ойыншыны тәртіпке шақырды. Қазіргі таңда Аликанте тумасы өз болашағы туралы ойлануда, бірақ әзірге негізгі құрамға қайта оралуға ұмтылып отыр.