Барселона Ханс Фликпен келісімшартын ұзартты

Каталондық «Барселона» бас бапкер Ханс Фликпен келісімшартын ұзарту туралы шешім қабылдады — жаңа келісім 2027 жылдың маусымына дейін жарамды.

Бір жыл бұрын екі жылдық мерзімге келген неміс маман көк-қызыл түстілерді үш трофейге жеткізді — Ла Лигадағы чемпиондық, Испания Кубогі мен ел Суперкубогі. Чемпиондар Лигасында каталондықтар жартылай финалға дейін жетіп, миландық «Интерге» жол берді.

«Ханс Флик жанкүйерлерді көптеген себептермен қуантты — командаға деген сенімділік, эпикалық қайта оралулар және трофейлер үшін. Неміс маман ‘Барселонаға’ Еуропадағы қауіпті қарсылас мәртебесін қайтарды», — делінген клуб мәлімдемесінде.

«Барселонаға» келгенге дейін Флик Германия құрамасымен жұмыс істеді, ал одан бұрын мюнхендік «Баварияны» триплға жеткізіп, Бундеслига, Германия Кубогі және Чемпиондар Лигасын жеңіп алған.