Балауса Мүздіман әлем чемпионы атағы үшін жекпе-жекке дайын

Meta-ratings.kz мәліметінше, Балауса Мүздіманның менеджері Үлия Мұсаханова қазақстандық боксшының титулдық жекпе-жекке толықтай дайын екенін мәлімдеді.

Жеңіл салмақта өнер көрсететін Мүздіман филиппиндік Мария Тереза Пинилимен өткен 8 раундтық кездесуде төрешілердің бірауызды шешімімен жеңіске жетті.

— «Мен өте қуаныштымын, себебі оған дәл осындай жекпе-жек қажет болатын. Бұған дейін ол тек 2017 жылғы дебютінде ғана толық қашықтықты өткерген. Бұл кездесуге дейін өзі де 8 раундты шайқас өткізу керек екенін айтқан еді. Енді ол әлем чемпионы атағы үшін айқасуға дайын», — деді Мұсаханова.

Менеджердің айтуынша, бұл жекпе-жек Мүздіманның жаттықтырушысының да ұзақ уақыт бойы күткен қадамдарының бірі болған.

Осы жеңістен кейін Балауса Мүздіман кәсіби мансабындағы жетінші жеңісіне қол жеткізді және жеңілмеген боксшы мәртебесін сақтап қалды.