Қазақстандағы футзал: шағын алаң қалай үлкен мақтанышқа айналды

Футболдың шағын әрі серпінді түрі — футзал соңғы онжылдықтарда Қазақстандағы ең табысты және танымал спорт түрлерінің біріне айналды. Оның жетістіктері спортшылардың жаңа буынын шабыттандырады және ел ішінде, одан тыс жерлерде де өзіне назар аудартады.

Шағын алаңда үлкен спорттың пайда болуы

Футзал Қазақстанда 1990-шы жылдары пайда болған. Ол қолжетімділігінің арқасында тез танылды: ойындарды спорт залдарында өткізу — қатал климаттық жағдайлар мен шектеулі инфрақұрылым мәселесін айналып өтуге мүмкіндік берді.
Ал Қазақстан футзалында нағыз серпіліс ұлттық құрама мен «Қайрат» клубы қол жеткізген үздік көрсеткіштердің арқасында пайда болды. Бұл жетістіктер оны танымал етіп қана қоймай, елдің спорттағы мақтанышына айналдырды.

Қазақстан құрамасының жетістіктері

Футзалдан Қазақстан ұлттық құрамасы КСРО ыдырағаннан кейін көп ұзамай құрылып, алғашқы ресми ойынын 1996-шы жылы өткізді. Азия Кубогының іріктеу турнирі аясында Катарға қарсы өткен кездесуде қазақстандықтар 1:0 есебімен жеңіске жеткен.
Содан бері біздің команда Еуропа және әлем чемпионаттарында бірнеше рет жоғары нәтижелерге ие болды. Мәселен, Қазақстан 2016-шы жылғы Еуропа чемпионатында қола, Азия чемпионатында күміс пен қола (1999, 2000) иеленді.
Команданың ойын стратегиясы мен психологиялық дайындығын айтарлықтай жақсартқан бапкер Пауло Рикардо Кака. Оның жетекшілігімен ел құрамасы Испания, Португалия сияқты алпауыттармен күш сынасып, әлемдік аренада қуатты бәсекелеске айналды. Команда тарихындағы ең үздік жетістік — 2021-ші жылғы әлем чемпионатындағы төртінші орын.

«Қайрат» — Қазақстан футзалының мақтанышы

«Қайрат» Қазақстан футзалының бетке ұстар командасына айналды. Ел чемпионатында тұрақты түрде жеңіске жетіп жүрген клуб, 2003-ші жылдан бері қатарынан 20 титулды иеленген. «Қайрат» — бұл тек еліміздің ең мықты командасы ғана емес, сонымен қатар еуропалық футзал көшбасшыларының бірі. УЕФА Чемпиондар лигасында екі мәрте жеңімпаз атану арқылы клуб, осы спорт түрінің көшбасшысы мәртебесін нығайтты.
Сонымен қатар, клуб жастарға арналған бағдарламаларды белсенді түрде дамытып, жас ойыншыларға үздік мамандармен жаттығуға мүмкіндік беруде. Өз кезегінде бұл ойынның жоғары деңгейін сақтап тұруға және болашақ жеңістерге негіз жасауға көмектеседі.

Қазақстанда футзал неге танымал?

Футзалдың танымал болуының бір себебі —оның қолжетімділігі. Ойын үлкен стадиондарды немесе қымбат инфрақұрылымды қажет етпейді. Шағын алаң болса жеткілікті. Осының нәтижесі болар, қазір жастар арасында футзалдың белсенді дамып келе жатқанын байқауға болады. Балалар мен жасөспірімдер лигалары, турнирлер мен жарыстар мыңдаған балаларды қамтыды. Бұл футзалды танымал етіп қана қоймай, оны бұқаралық спортқа айналдыруда.

Мәселелер

Жетістіктерге қарамастан, Қазақстан футзалының алдында бірқатар қиындықтар бар. Басты мәселелер — мамандандырылған спорт нысандарының аздығы және аймақтардағы командаларды қаржыландырудың жеткіліксіздігі.
Дегенмен, бұл спорты түріне деген қызығушылықтың артуы және үкімет пен демеушілердің қолдауы оның болшағы зор екендігіне сенім тудырады. Осылайша, Қазақстан футзалы күннен күнге еліміздің спорт мәдениетінің маңызды бөлігіне айналып, дамуын жалғастырып келеді.
Қорытынды

Қазақстандағы футзал — жай ғана спорт түрі емес. Бұл шағын алаңның ұлы жеңістер алаңына айналғаны туралы тарихи оқиға. Табандылық, дарын және қоғамның қолдауы арқасында футзал ұлттық мақтаныштың символына айналды.
Бүгінгі таңда ұлттық құрама мен «Қайрат» клубының жетістіктері ойыншылардың жаңа буынын шабыттандыратыны сөссіз, ал футзалдың өзі Қазақстанның халықаралық аренадағы спорттық имиджін нығайтуға ықпал етеді. Ең бастысы, ол шағын алаңда да шын мәнінде үлкен жетістіктерге жетуге болатынын дәлелдеді.