Австралиялық Гровс Тур де Франстың таулы кезеңін жеңді, «Астана» велошабандозы — төртінші

Alpecin-Deceuninck командасының өкілі Кэйден Гровс Тур де Франстың 20-шы кезеңінің жеңімпазы атанды — велошабандоздар Нантюадан Понтарльеге дейінгі 184.2 шақырымдық таулы қашықтықты жүріп өтті.

Нидерланд велошабандоздары жүлделі орындарға ие болды — Франк Ван Ден Брук (Picnic PostNL) 54 секунд айырмашылықпен екінші орынға тұрақтаса, Паскаль Энкхорн (Soudal Quick-Step) жеңімпаздан 59 секунд қалып үшінші орынды иеленді.

«Астана» командасының велошабандозы Симоне Веласко жеңімпаздан 1 минут 4 секундқа қалып, төртінші нәтиже көрсетті. Қазақстандық команданың басқа өкілдері айтарлықтай айырмашылықпен мәреге жетті — Давиде Баллерини мен Майк Тёниссен тиісінше 13-ші және 14-ші орындарды иеленді.

Көпкүндіктің жалпы есебінде UAE Team Emirates-XRG командасының словениялық велошабандозы Тадей Погачар көш бастап келеді, ол даниялық Йонас Вингегордан 4 минут 24 секундқа алда. Жалпы жіктемеде «Астана» велошабандоздары арасында Серхио Игита үздік көрсеткішке ие — ол 1 сағат 8 минут 19 секунд айырмашылықпен 14-ші орында тұр.