Australian Open: қазақстандық теннисшілердің қарсыластары белгілі болды

12 қаңтарда теннистен Аустралия ашық біріншілігі басталатыны анық. «Үлкен дулыға» санатындағы турнирге Қазақстаннан үш теннисші қатысады, — деп хабарлайды Бірінші бол. Бүгінде олардың алғашқы айналымдағы қарсыластары анықталды.

Мәселен, әлемнің алтыншы, еліміздің бірінші ракеткасы саналатын Елена Рыбакина алғашқы ойынын аустралиялық Эмерсон Джонсқа (371-орын) қарсы өткізеді. Оны жеңген жағдайда Нурия Паррисас-Диас немесе Ива Йовичпен кортқа шығады.

Ал, Юлия Путинцева (25-орын) бірінші кездесуін армениялық Элина Аванесянға қарсы өткізеді. Олардың екеуі де Ресей тумасы. Қос теннисші 2023 жылы Пекиндегі турнирде кездесіп, ол кезде Путинцева 6:1, 6:4 оңай жеңіске жеткен болатын.

Ерлер сынында өнер көрсететін жалғыз қазақстандық Александр Бублик (33-орын) бірінші айналымда аргентиналық Франсиско Серундоломен өзара мықтыны анықтайды. Екеуі бұған дейін ресми жарыстарда кездеспеген.

Айта кету керек, Қазақстанның өзге үш теннисшісі – Михаил Кукушкин, Дмитрий Попко және Тимофей Скатов жарыстың іріктеуінен өте алмай қалды. Олардың барлығы да Ресейден алдырған легионерлер.