«Атырау» қақпашы Арсен Сиукаевпен қоштасты

Футбол клубы «Атырау» ресейлік қақпашы Арсен Сиукаевпен келісімшарттың бұзылғанын мәлімдеді, деп хабарлайды клубтың баспасөз қызметі.

Биылғы маусымда Сиукаев Қазақстан Премьер-лигасында 10 матч өткізіп, 23 гол жіберіп алды. Тағы үш кездесуде қосалқы құрамда болды.

14 турдан кейін «Атырау» турнир кестесінде соңғы орында тұр. Команда бар болғаны 4 ұпай жинаған (1 жеңіс, 1 тең ойын). Доп айырмашылығы – 9:33.

Бұған дейін клуб бірнеше легионермен де қоштасқан: қорғаушылар Фахриддин Ахтамов, Матеус Барбоса, Гиорги Гадрани, Гиа Чадунели және жартылай қорғаушылар Гильерме Перейра, Евгений Козлов пен Никита Капленка.